Қорғаныс министрлігі суицид саны азайғанын мәлімдеді
Биылдың өзінде 2 сарбаз абайсызда қайтыс болған.
SMARTNEWS.KZ басылымының хабарлауынша, Қорғаныс министрінің орынбасары Асқар Мұстабеков Қазақстан Қарулы Күштерінде суицид санының төмендегенін мәлімдеді. 2026 жылдың қаңтар айында екі қайғылы жағдай тіркелгенімен, олардың нақты себептері тергеу барысында анықталуда.
“Суицид әр жерде кездеседі: мектептерде, университеттерде, әскерде де бар. Соған қарамастан, Қарулы Күштерде соңғы жылдары осындай жағдайлар азайды. Биыл екі оқиға тіркелді, бірақ олардың нақты себебі тергеу аяқталғанға дейін белгісіз”, – деді Мұстабеков.
Министр орынбасары қазіргі жағдайды жүйелі проблема деп есептемейтінін атап өтті. 2025 жылы әскерде екі ұқсас оқиға тіркелген, ал 2024 жылы – үш жағдай болған.
Асқар Мұстабеков әскерге шақырылған сарбаздар үшін әлеуметтік жағдайлардың жақсарғанын хабарлады. Оған әлеуметтік жеңілдіктер, тұрғын үймен қамтамасыз ету және күнделікті тамақтандыру көлемінің 28%-ға ұлғаюы кіреді.
“Қазіргі таңда әскери борышын өтейтіндерге барлық қолайлы жағдай жасалған. Әлеуметтік жеңілдіктер мен тұрғын үймен қамтамасыз ету қарастырылған. Биылдан бастап күнделікті тамақ рационы 28% өсті”, – деді ол.
Дегенмен қаңтарда сарбаздардың өліміне қатысты екі жағдай тіркелді.
23 қаңтар, Өскемен: 19 жастағы мерзімді әскери қызметкер қарауылда тұрған кезінде абайсызда қарудан оқ атылып қаза тапты. Қылмыстық іс қозғалып, тергеу гарнизонның Әскери прокуратурасының бақылауына алынды.
27 қаңтар, Жамбыл облысы: тағы бір мерзімді әскери қызметкер қарумен жұмыс істегенде өлімге әкелетін жарақат алды. Қаза болу мән-жайын Ішкі істер министрлігі тергеп жатыр. Оқиғаны тергеу үшін арнайы жедел топ құрылып, өңірге Қорғаныс министрлігі, Әскери прокуратура және әскери-тергеу органдарының өкілдері жіберілді.
Министрлік мәліметінше, суицид жағдайларының төмендеуі әскерде әлеуметтік қолдау мен қауіпсіздік шараларының күшейгенімен байланысты.
Материал авторы
