RUS
SMARTNEWS.KZ басылымының хабарлауынша, Риддер қаласында аула ішінде алты жастағы баланы қағып, оқиға орнынан кетіп қалған жүргізушіге сот үкім шығарды.
Оқиға 2025 жылғы 23 желтоқсанда Төртінші шағынаудандағы тұрғын үйлердің бірінің ауласында болған. Yk-news.kz сайтының хабарлауынша, Lada X-Ray маркалы автокөлікті басқарған жүргізуші кәмелетке толмаған жаяу жүргіншіні қағып кеткен.
Сотта анықталғандай, жүргізуші баланы қағып алғаннан кейін көлігін тоқтатып, сыртқа шыққан және баламен қысқаша сөйлескен. Өз пайымынша «бәрі дұрыс» екеніне көз жеткізген соң, ол жедел жәрдем де, полиция да шақырмай, оқиға орнынан кетіп қалған.
Жол-көлік оқиғасы куәгерлердің хабарламалары мен көпқабатты үй кіреберісіне орнатылған бейнебақылау камералары арқылы белгілі болған.
Риддер қалалық сотының мәліметінше, апат салдарынан бала денсаулығына жеңіл зиян келтірілген.
Сот жүргізушіні Әкімшілік құқық бұзушылық туралы кодекстің 610-бабының 2-бөлігі бойынша — жол қозғалысы қағидаларын бұзып, денсаулыққа жеңіл зиян келтіру фактісі үшін кінәлі деп таныды. Оған 173 мың теңге көлемінде айыппұл салынды.
Сонымен қатар, жол-көлік оқиғасы орнын тастап кеткені үшін ӘҚБтК-нің 611-бабының 2-бөлігі бойынша бір жыл мерзімге көлік құралын басқару құқығынан айырылды.
Жәбірленуші тараптың адвокаты Ольга Кайгородованың айтуынша, оқиғадан кейін дәрменсіз күйдегі адамды қауіпті жағдайда қалдыру дерегі бойынша қылмыстық іс те қозғалған.
«Қылмыстық іс қозғалғаннан кейін жүргізуші жәбірленушілермен өзі байланысқа шығып, кешірім сұрады. Жәбірленуші тарап кешірімін қабылдап, қылмыстық қудалауды тоқтату туралы өтініш жазды. Себебі жүргізуші шын мәнінде өкініш білдірді және зейнет жасына таяп қалған азамат болып шықты. Қазір баланың жағдайы жақсы, ауыр салдары болған жоқ», – деді қорғаушы.