RUS
SMARTNEWS.KZ басылымының хабарлауынша, Шымкентте кісі қолынан қаза тапқан Нұрай Серікбайдың отбасы қылмыстық істі Ішкі істер министрлігінің Тергеу департаментіне беруді талап етті.
Марқұмның отбасының мүддесін қорғап жүрген адвокат Сержан Нұрпейісовтің айтуынша, жәбірленуші тарап Нұрай Серікбайдың өліміне қатысты тіркелген қылмыстық істі ІІМ-нің Тергеу департаменті тергеуі тиіс деп санайды. Сонымен бірге іс бойынша прокурорлық қадағалауды Бас прокуратураға жүктеу қажет деген талап қойылған.
Адвокаттың мәлімдеуінше, бұл ұстаным жәбірленуші тараптың Шымкент қалалық полиция департаменті мен қала прокуратурасының жұмысына сенімсіздік танытуымен байланысты.
«Осы деректер жәбірленуші тараптың Шымкент қаласының полиция департаментіне және Шымкент қаласының прокуратурасына деген сенімсіздігін тудырып отыр және қылмыстық істің ары қарай осы органдарда тергелуіне қарсылық білдіреді», – делінген ресми мәлімдемеде.
Сержан Нұрпейісовтің сөзінше, марқұмның отбасы іс тергеуі Ішкі істер министрлігінің орталық аппаратына беріліп, прокурорлық бақылау Бас прокуратура деңгейінде жүзеге асқан жағдайда ғана сотқа дейінгі тергеу әділ әрі жан-жақты өтеді деп есептейді.
Еске салайық, 11 қаңтар күні кешке Шымкент қаласында 21 жастағы Нұрай Серікбай пышақ жарақаттарынан қаза тапқаны хабарланған болатын. Аталған дерек бойынша Қылмыстық кодекстің 99-бабының 1-бөлігі «Адам өлтіру» фактісімен қылмыстық іс қозғалды. Күдікті ретінде 28 жастағы Шерхан Аймахан есімді ер адам қамауға алынған.
Марқұмның туыстары Нұрай Серікбайдың бұған дейін күдіктіге қатысты полицияға бірнеше рет шағымданғанын, алайда арыздарының қабылданбағанын алға тартады. Олар полиция қызметкерлерін немқұрайлық танытты деп айыптап отыр.
Бұл іске Мемлекет басшысы Қасым-Жомарт Тоқаев та пікір білдіріп, оқиғаның қоғамда үлкен резонанс тудырғанын атап өткен. Президент Ішкі істер министрлігіне Шымкент қалалық полиция департаментінің әрекетіне құқықтық баға беруді тапсырған еді.