RUS
SMARTNEWS.KZ басылымының хабарлауынша, Талдықорған қаласында үш жасар қызды әкесі ұрып-соғып, бала ауыр халде жансақтау бөліміне түсті.
Дәрігерлердің мәліметінше, бүлдіршін 2 ақпан күні кешкі уақытта облыстық балалар ауруханасына жеткізілген. Ол дереу анестезиология, реанимация және қарқынды терапия бөліміне жатқызылған. Қазіргі уақытта баланың жағдайы ауыр.
Әлеуметтік желілерде кішкентай қыздың денесіндегі соққы іздері мен көгерген жарақаттары көрінетін бейнежазба тарады. Анасының айтуынша, баласына дене жарақатын мас күйде болған әкесі салған.
Жетісу облыстық полиция департаменті аталған дерекке қатысты ресми түсініктеме берді.
Ведомствоның хабарлауынша, 2 ақпан күні сағат 21:00 шамасында «102» арнасына медициналық мекемеден үш жасар баланың зорлық белгілері бар жарақаттармен жеткізілгені туралы хабар түскен.
«Аталған дерек бойынша «Денсаулыққа қасақана ауыр зиян келтіру» бабы бойынша қылмыстық іс тіркелді. Полиция қызметкерлері күдіктінің тұрғылықты мекенжайына жедел барып, ер адамды ұстады. Ұсталған сәтте ол алкогольдік мас күйде болған», – деп мәлімдеді полиция.
Қазіргі уақытта анасы мен бала медициналық мекемеде. Зардап шеккен қызға қажетті медициналық көмек көрсетіліп жатыр.
Полиция өкілдері оқиғаның барлық мән-жайын жан-жақты әрі объективті анықтауға бағытталған тергеу және процессуалдық шаралар жүргізіліп жатқанын атап өтті. Сотқа дейінгі тергеп-тексеру барысы департамент басшылығының тікелей бақылауында.