Тараздағы фосфор зауытындағы апат кезінде күйік алған жұмысшы көз жұмды
Фосфор шлагы атқылап, 32 жастағы жұмысшы мерт болды.
SMARTNEWS.KZ басылымының хабарлауынша, Тараз қаласындағы Новожамбыл фосфор зауытында болған өндірістік оқиғадан кейін ауыр күйік алған жұмысшы көз жұмды.
Алдын ала мәліметке сәйкес, ер адам денесінің 45 пайызы күйіп, ауруханаға жеткізілген. Оқиға оның жұмыс істеп жатқан цехында фосфор шлагының кенеттен атқылауы салдарынан болған. Сол сәтте қауіпті аймақта тағы екі қызметкер тұрған.
Дереккөздердің хабарлауынша, үш жұмысшы пеш маңында болған кезде фосфор шлагы сыртқа лақтырылған. Барлығы да дене және тыныс алу жолдарының ауыр күйігін алған.
32 жастағы жұмысшының өмірі үшін дәрігерлер үш күн бойы күрескенімен, оны аман алып қалу мүмкін болмады. Қалған екі қызметкер қазір дәрігерлердің тұрақты бақылауында.
Қайғылы жағдайдың нақты себептері мен оған кімнің жауапты екені арнайы комиссияның тексеруі барысында анықталмақ. Аталған дерек бойынша қылмыстық іс тіркеліп, шұғыл тексеру жұмыстары басталды.
Жамбыл облысы бойынша мемлекеттік еңбек инспекциясы комитетінің өкілдері оқиғаға құқықтық баға беру үшін ведомстволық комиссия құрылғанын хабарлады.
«Еңбек инспекциясы департаментінің бұйрығымен жазатайым оқиғаны тексеру жөніндегі комиссия құрылды. Комиссия бұл жағдайдың мән-жайын, себептерін анықтап, құқықтық бағасын береді», – деді Жамбыл облысы бойынша мемлекеттік еңбек инспекциясы комитеті бөлімінің басшысы Бекжан Әбді.
Материал авторы
