Боран, тұман және аяз: Ел аумағында ауа райы күрт бұзылады

SMARTNEWS.KZ басылымының хабарлауынша, «Қазгидромет» дерегіне сәйкес, 4–6 ақпан аралығында елдің бірқатар өңірінде ауа райы күрт нашарлайды. Негізгі қауіп – тұман, қар мен жаңбыр аралас жауын-шашын, бұрқасын, көктайғақ және желдің күшеюі. Кей аймақтарда температура бірнеше градусқа бірден төмендейді.

Түркістан облысында 4 ақпанда тұман күтіледі, таулы аудандарда желдің екпіні 15–20 м/с-қа дейін жетуі мүмкін. Ал 6 ақпанда ауа температурасы күндіз облыстың солтүстігі мен таулы аймақтарында 1 градус аязға дейін төмендейді. Шымкент пен Түркістан қалаларында да күндізгі температура күрт төмендейді.

Қарағанды, Ұлытау, Павлодар, Ақмола облыстарында 4 ақпанда тұман түседі, жекелеген өңірлерде жел күшейеді. Жезқазған, Қарағанды және Көкшетау қалаларында да қолайсыз метеожағдай болжанып отыр.

Солтүстік Қазақстан облысында 4–5 ақпанда қар, жаңбыр аралас жауын-шашын, бұрқасын, көктайғақ және қатты жел күтіледі. Ал 6 ақпанда ауа температурасы түнде 18–23, солтүстігінде 26 градус аязға дейін, күндіз 15–20 градус аязға дейін күрт төмендейді. Петропавлда да температура осындай деңгейге дейін құлдырайды.

Ақтөбе облысында 4 ақпанда түнде қатты қар, күндіз жаңбыр мен қар аралас жауын-шашын жауып, көктайғақ пен тұман күтіледі. Ақтөбе қаласында жолдарда мұз қату қаупі бар.

Атырау, Батыс Қазақстан және Маңғыстау облыстарында да ауа райы күрт суытады. Атырау облысында 4 ақпанда күндіз 5–10 градус аязға дейін төмендеп, 5 ақпанда түнде 17–22 градус аязға дейін күшейеді. Батыс Қазақстан облысында күндізгі температура 15–20 градус аязға дейін төмендейді. Маңғыстау облысында 4 ақпанда 0–5 градус аяз, солтүстік-шығысында 8 градус аязға дейін суытады, 5 ақпанда 7–12 градус аяз күтіледі.

Абай және Шығыс Қазақстан облыстарында қар, бұрқасын, тұман және желдің екпіні 15–20 м/с-қа дейін жетуі мүмкін. Жетісу және Алматы облыстарының таулы аудандарында кей уақытта қатты жауын-шашын, жолдарда көктайғақ, тұман болжанып отыр.

Қызылорда облысында тұман күтіледі, батыс бөлігінде көктайғақ қаупі бар.

Синоптиктер жүргізушілер мен алыс жолға шығатын азаматтарға ауа райының күрт өзгеруін ескеріп, жол қозғалысында ерекше сақ болуды ескертеді.