RUS
SMARTNEWS.KZ басылымының хабарлауынша, Ақтауда екі қабатты техникалық қызмет көрсету станциясында ірі өрт шығып, екі қызметкер ауыр жарақат алды.
Төтенше жағдай 29А шағынауданында орналасқан көлік жөндеу орталығы аумағында тіркелген. Өрт нысанның бес боксының екеуін шарпыған. Жалын салдарынан бірнеше автокөлік жанып кеткен.
Маңғыстау облыстық төтенше жағдайлар департаментінің мәліметінше, станцияда жұмыс істеген екі адам күйік жарақатымен ауруханаға жеткізілген. Дәрігерлер олардың жағдайын ауыр деп бағалап отыр. Зардап шеккендер жансақтау бөліміне жатқызылып, өкпені жасанды желдету аппаратына қосылған. Бір қызметкердің денесінің едәуір бөлігін термиялық күйік шалған. Екіншісіне II–III дәрежелі күйік және түтіннен тыныс алу жолдарының зақымдануы диагнозы қойылған.
Өрт кезінде көлік жөндеу орталығының ішіндегі үш автокөлік зақымданған: бір көліктің қозғалтқыш бөлігі мен салоны жанып кеткен, тағы екі көлік толықтай өртенген. Ғимарат сыртында тұрған бірқатар көлік те оттан зардап шеккен.
Өрт шамамен 150 шаршы метр аумақты қамтыған. Ғимараттың жалпы аумағы – 600 шаршы метр.
Тілсіз жау сағат 09:21-де оқшауланып, 10:43-те толық сөндірілген. Өрттің шығу себебі анықталып жатыр. Оқиға орнында төтенше жағдайлар қызметі, полиция және апат медицинасы бригадалары жұмыс істеді.