RUS
SMARTNEWS.KZ басылымының хабарлауынша, Таиландта Қостанай қаласының тұрғыны Алексей Вивтоненко жансақтау бөлімінде жатыр. Оның туыстары әлеуметтік желілер арқылы жерлестерінен ем-домға қаржылай көмек сұрап, үндеу жасады.
Жақындарының айтуынша, ер адам Таиландқа демалысқа барған. Алайда 31 қаңтар күні оның жағдайы күрт нашарлап, дәрігерлердің көмегіне жүгінуге мәжбүр болған. Алғашқы емнен кейін хал-ахуалы уақытша тұрақталғанымен, 2 ақпанда ол ауруханаға қайтадан аса ауыр жағдайда жеткізілген.
Дәрігерлер науқасқа «жедел панкреатит, сепсис асқынуы, бүйректің жедел зақымдануы және екіжақты пневмония» диагнозын қойған.
Қазіргі таңда Алексей дәрі-дәрмек арқылы жасанды комаға енгізілген, өкпені жасанды желдету аппаратына қосылған және гемодиализ қабылдап жатыр. Ол Пхукеттегі Vachira Phuket Hospital клиникасында ем алуда.
Туыстарының мәліметінше, стандартты медициналық сақтандыру небәрі алғашқы екі күннің шығынын ғана өтеген. Бұл сома 10 мың долларды құраған және сақтандыру лимиті толық таусылған. 4 ақпаннан бастап барлық шығынды отбасы өз қалтасынан төлеуге мәжбүр.
Клиникада жансақтау бөлімінде бір тәулік жатудың құны 55 мыңнан 70 мың батқа дейін жетеді. Бұл шамамен 860 мыңнан 1 миллион теңгеге дейін. Операциялық араласу қажет болған жағдайда, шығын бұдан да артуы мүмкін. Емдеуді жалғастыру үшін медициналық мекеме 500 мың бат көлемінде депозит талап етіп отыр.
Дәрігерлер науқастың жағдайы әлі де ауыр екенін айтып, оны Қазақстанға жеткізу әзірге мүмкін емес екенін мәлімдеген.