RUS
Келес ауданында еліміздегі ең үлкен жылыжай кешенінің капсуласын қою рәсімі өтті. 500 гектар аумақта орналасатын өнеркәсіптік жылыжайлар жобасы «ЭКО-культура» компаниясының қолдауымен жүзеге асып отыр.
Мұнда негізінен қызанақ пен қияр өсірілмек. Заманауи жылыжай кешені жылыту жүйесі мен салқындатуды, жарық режимін, тамшылатып суаруды, атмосферадағы көмірқышқыл газының мөлшерін басқаратын заманауи автоматтандырылған климаттық бақылау жүйесімен жабдықталады.
Салтанатты жиынға Түркістан облысының әкімі Дархан Сатыбалды,«Қазақстан Даму Банкі» АҚ Басқарма төрағасы Нұрлан Байбазаров, «KazakhInvest» АҚ-ның Басқарма төрағасы Мейіржан Юсупов, «ЭКО-культура» агрөнеркәсіптік холдингі директорлар кеңесінің төрағасы Александр Рудаков қатысты. Өңір үшін бұл жобаның аса маңызды екенін айтқан облыс әкімі өңірде агроөнеркәсіп кластері дамитынын жеткізді.
«Түркістан – республика халқын жеміс-жидекпен және көкөніс өнімдерімен қамтамасыз ететін негізгі өңір. Облыста 1569 гектар алқапта 3366 бірлік жылыжай бар. Бұл республикадағы жылыжайлардың 71 пайызы құрайды. Онда 12 мыңнан астам адам еңбек етуде. 2015 жылмен салыстырғанда аталған салаға тартылған инвестиция көлемі 7 есеге ұлғайды, – деді Дархан Сатыбалды.
Ресейлік «ЭКО-культура» агрөнеркәсіптік холдингі директорлар кеңесінің төрағасы Александр Рудаков бұл жоба агросаланы дамытуға үлкен серпін беретінін атап өтті.
Келес ауданы, Бірлік ауылында жүзеге асатын жобаның бірінші кезеңінің құрылысы 2024 жылдың тамыз айында аяқталады деп жоспарланып отыр. Ал бүкіл жоба 2027 жылы толықтай жүзеге аспақ.