RUS
SMARTNEWS.KZ басылымының хабарлауынша, Елнұр Бейсенбаев Қазақстан Республикасы Президенті Әкімшілігінің Ішкі саясат бөліміне жетекші болып тағайындалды. Бұл жөнінде Ақорданың ресми хабарламасында айтылды.
Мемлекет басшысының өкімімен Бейсенбаев Елнұр Сабыржанұлы Президент Әкімшілігінің Ішкі саясат бөлімінің меңгерушісі қызметіне кірісті.
Елнұр Бейсенбаев 1986 жылғы 27 маусымда Кентау қаласында дүниеге келген. Әл-Фараби атындағы Қазақ ұлттық университетінің түлегі. Саясаттанушы, әлеуметтік ғылымдар магистрі.
Еңбек жолын «Жастар үні» жастар қоғамдық ұйымында маман ретінде бастап, 2009 жылы ұйым басшысы болып тағайындалды.
2012–2015 жылдары тарих пәнінің мұғалімі болып жұмыс істеп, Алматы қалалық Қазақстан коммунистік халық партиясы филиалында идеология және насихат жөніндегі хатшы қызметін қоса атқарды.
2016–2017 жылдары жастар жобалары және ұйымдастыру жұмыстары бөлімін басқарды. Кейін Алматы қаласы әкімдігінің жастар саясаты мәселелері басқармасының басшысы болды.
2017 жылы 28-қысқы Универсиада аясында 3 мың еріктінің жұмысын ұйымдастырып, үйлестірді.
2017–2018 жылдары Абай атындағы Қазақ ұлттық педагогикалық университетінде тәрбие жұмысы жөніндегі департамент директоры қызметін атқарды.
2019 жылы Нұр-Сұлтан қаласы әкімінің әлеуметтік мәселелер жөніндегі кеңесшісі болды.
2020 жылы «Nur Otan» партиясы жанындағы «Jas Otan» жастар қанатының төрағасы болып сайланды.
2021–2023 жылдары Қазақстан Республикасы Парламенті Мәжілісінің VII шақырылымының депутаты, әлеуметтік-мәдени даму комитетінің мүшесі болды.
2023 жылғы 4 қаңтар мен 17 шілде аралығында «AMANAT» партиясының атқарушы хатшысы қызметін атқарды.
2023 жылғы 29 наурыздан бері Қазақстан Республикасы Парламенті Мәжілісінің VIII шақырылымының депутаты, «AMANAT» партиясының тізімі бойынша сайланған, партия фракциясының жетекшісі болды.