Астанада мектеп оқушысы автобус жүргізетін әкесіне маршрут үстінде ас әкелді (ВИДЕО)
Видео әлеуметтік желіде кең тарап, жұрттың жылы пікіріне ие болды.
SMARTNEWS.KZ басылымының хабарлауынша, Астанадағы қоғамдық көлікте жолаушылар әсерлі көрініске куә болды. Мектеп жасындағы қыз бала автобус бағыты үстінде әкесіне — жүргізушіге түскі асын әкеліп берген.
Оқиға сәті видеоға түсіп, әлеуметтік желіде кеңінен тарады. Кадрдан қыздың автобус салонына кіріп, әкесіне тамақ салынған контейнерді ұқыппен табыстап, оның алғанына көзі жеткен соң келесі аялдамадан түсіп кеткені байқалады. Әкесі қызына алғысын білдірген.
Бейнежазба желі қолданушыларының жылы ықыласын тудырды. Пікір қалдырғандар бұл көріністі «шынайы қамқорлықтың үлгісі» деп бағалап, отбасы арасындағы сыйластық пен мейірімнің азайып бара жатқан заманда мұндай сәттердің ерекше құнды екенін жазды.
Көпшілік дәл осындай қарапайым, бірақ шын көңілден туған әрекеттер қоғамға отбасының, жанашырлық пен адамдық қарым-қатынастың маңызын еске салатынын атап өтті.
Материал авторы
