RUS
SMARTNEWS.KZ басылымының хабарлауынша, Қазақстан армиясында тағы бір адам өлімі тіркелді. Ақпаратты Қазақстан Республикасының Құрлық әскерлері растады.
2026 жылғы 17 ақпанда Маңғыстау облысындағы Бейнеу полигоны аумағында Қазақстан Қарулы күштері Құрлық әскерлерінің Батыс өңірлік қолбасшылығы құрамында қызмет атқарып жүрген мерзімді әскери қызметші қаза тапты.
Ресми дерекке сәйкес, оқиға жоспарлы далалық атыс жаттығулары кезінде болған. Қару қолдану барысында сарбаз өмірімен сыйыспайтын жарақат алған.
Аталған факті бойынша Батыс өңірдің әскери-тергеу органдары қылмыстық іс қозғап, сотқа дейінгі тергеу басталды. Қазір оқиғаның барлық мән-жайы мен себептері анықталып жатыр.
Қорғаныс министрінің тапсырмасымен оқиға орнына арнайы комиссия жіберілді. Комиссияны Қорғаныс министрінің орынбасары, генерал-майор Шайх-Хасан Жазықбаев басқарып отыр.
Қазақстан Республикасының Қарулы Күштері марқұмның туған-туыстары мен жақындарына көңіл айтты. Ведомство өкілдерінің мәліметінше, қаза тапқан әскери қызметшінің отбасына заңнамаға сәйкес барлық қажетті көмек көрсетіледі.
Айта кетейік, 2026 жылғы қаңтар айында Қазақстанда мерзімді әскери қызметтегі төрт сарбаз көз жұмған.