RUS
SMARTNEWS.KZ басылымының хабарлауынша, Қазақстанның Ұлттық қауіпсіздік комитеті Шығыс Қазақстан облысы әкімінің бірінші орынбасары Жақсылық Омарға қатысты тергеу жүріп жатқанын растады. Бұл туралы Kazinform жазды.
Комитеттің ресми жауабына сәйкес, қазіргі уақытта сотқа дейінгі тергеп-тексеру амалдары жүргізіліп жатыр.
«Сотқа дейінгі тергеу басталды. Қылмыстық-процестік кодекстің 201-бабының 1-бөлігіне сәйкес өзге ақпарат жариялауға жатпайды», – делінген ҰҚК жауабында.
Құқық қорғау органы ықтимал құқық бұзушылықтың бабы мен қолданылған процессуалдық шаралар туралы мәлімет беруден бас тартты.
Бұған дейін әлеуметтік желілер мен бірқатар бұқаралық ақпарат құралдарында шенеуніктің ұсталғаны жөнінде ақпарат тараған. Алайда Шығыс Қазақстан облысы әкімдігі бұл мәліметті растаған жоқ.
Әкімдік өкілдерінің мәлімдеуінше, интернетте тарап жатқан ақпарат ресми дереккөздермен расталмаған. Олардың айтуынша, лауазымды тұлға денсаулығына байланысты уақытша еңбек демалысына шыққан.
Жақсылық Омар 2025 жылдың сәуір айында Шығыс Қазақстан облысы әкімінің бірінші орынбасары болып тағайындалған. Бұған дейін ол алты жыл бойы Өскемен қаласының әкімі қызметін атқарған.
Айта кетейік, бұған дейін ҰҚК Қостанай облысы әкімінің орынбасарының ұсталғанын да ресми түрде растаған еді.