Олимпиада жарыс жолына шыққан итті шаңғышылар қасқыр деп ойлап қалды (ВИДЕО)

SMARTNEWS.KZ басылымының хабарлауынша, Тезеро маңындағы Олимпиадада әйелдер командалық спринтінің іріктеу жарысында күтпеген оқиға болды. Жарыс жолына ит шығып кетіп, грек спортшысы Константина Харалампиду мен хорват спортшысы Тена Хаджичтің жанында жүгірді.

Хаджич кейінірек:

«Бірінші сәтте мен оны қасқыр деп ойладым. Жарыстың ауырлығы әсерінен елестеді ме деп қорқып кеттім. Ол өте үлкен болды, қасына келгенде тістей ме деп қорқып кеттім», – деді.

Харалампиду болса: 

«Бақытқа орай, ол өте сабырлы еді. Финишке камераның артынан жүгіріп келді, мейірімді болды және жарысқа кедергі жасамады. Бұл күлкілі оқиға болды. Енді мен оның арқасында танымал болдым, ризашылығымды білдіруім керек», – деді.

NPR хабарлауынша, иттің аты – Назгүл, екі жастағы чехословак қасқыры, ол стадионға жақын үйде тұрады. Ит ұсталып, жарыс жолынан шығарылды. Финалда алтынды Швеция, күмісті Швейцария, қола медалды Германия командалары жеңіп алды.