Ақмола облысында 73 жастағы зейнеткер алаяқтық үшін сотталды
Алаяқ зейнеткер жазаланды.
SMARTNEWS.KZ басылымының хабарлауынша, Ақмола облысында 73 жастағы зейнеткерге қатысты алаяқтық ісі бойынша сот отырысы өтті. Іс елдімекен тұрғындарына құқықбіліктілікті арттыру және құқық бұзушылықтың алдын алу мақсатында көрсетілімдік сипатта ұйымдастырылған.
Сот мәліметі бойынша, зейнеткер зардап шегушіге 350 мың теңгеге жүргізуші куәлігін рәсімдеуге көмектесемін деп уәде берген. Алайда ақшаны алғаннан кейін 2024 жылдың мамырынан бастап ол байланысқа шықпаған және қаражатты қайтармаған. Айыпталушы ешқандай арнайы органда жұмыс істемеген және қызмет көрсету мүмкіндігі болмаған.
Сотта айыпталушының кінәсін мойындауы, өкініш білдіруі, 73 жастағы зейнеткердің жасы, бұрын сотталмағаны және зардап шегушінің оны қатаң жазалаудың қажеті жоқ деп санайтыны ескерілді.
Сот шешімі бойынша зейнеткерге 9 айға қатаң бақылаудағы шектеу түріндегі жаза тағайындалды, бірақ Конституцияның 30 жылдығына байланысты амнистия заңын қолдану арқылы ол қылмыстық жауапкершіліктен босатылды. Зардап шегушіге материалдық зиян ретінде 350 мың теңге өндірілді.
Сот актісі әлі заңды күшіне енген жоқ.
Материал авторы
