RUS
SMARTNEWS.KZ басылымының хабарлауынша, Солтүстік Қазақстан облысында TikTok желісіндегі пікір үшін сотталған әйелге қатысты қылмыстық іс қоғамда қызу талқыланып жатыр.
Сот материалдарына сәйкес, өңірдің 40 жастағы тұрғыны TikTok әлеуметтік желісінде жарияланған бейнероликтің астына арандатушылық мазмұндағы пікір қалдырған.
Тергеу нұсқасына сәйкес, сөз болған видео Петропавл қаласының атауына қатысты талқылауға арналған. Ал әйелдің ашық парақшада жариялаған пікірі Қазақстан Республикасының аумақтық тұтастығын жоққа шығаруға бағытталған мәлімдеме ретінде бағаланған.
Аталған жазба әлеуметтік желіде жылдам тарап, бейнеролик жойылғанға дейін мыңдаған лайк пен пікір жинаған.
Оқиғадан кейін қолданушылардың бірі мемлекеттік e-Otinish сервисі арқылы құқық қорғау органдарына жүгініп, жазба авторына қатысты тексеріс жүргізуді сұраған.
Есепке алу және жедел-іздестіру шаралары барысында аккаунт иесін Қазақстан Республикасының Ұлттық қауіпсіздік комитеті-нің экстремизмге қарсы іс-қимыл бөлімшелері анықтаған. Пікір жарияланған ұялы телефон тәркіленіп, аккаунттың нақты осы адамға тиесілі екені расталған.
Сотта әйел өз кінәсін мойындаған жоқ. Ол пікірді жазғанын растағанымен, айтылған сөздерді «тарихи дерек» ретінде қабылдағанын, бұл мәліметті өзіне әжесі айтқанын алға тартты. Сонымен бірге, ойын дұрыс жеткізе алмағанын және TikTok алгоритмдері мәтінді толық жазуға мүмкіндік бермегенін мәлімдеді. Бұған қоса, ол бұған дейін сепаратизм үшін қылмыстық жауапкершілік бар екенін білмегенін айтты.
Алайда сот тағайындаған психологиялық-лингвистикалық сараптама (саясаттанушының қатысуымен) бұл уәжбен келіспеді. Сарапшылар пікір мәтінінде Қазақстанның аумақтық тұтастығын бұзуды насихаттау белгілері бар деген қорытынды шығарған.
Сот отырысында әлеуметтік желі қолданушылары әйелді жауапкершілік туралы алдын ала ескертіп, Қылмыстық кодекстің баптарын да келтіргені белгілі болды. Алайда ол жазбаларға жауап ретінде «ешкімнен де, ештеңеден де қорықпайтынын» білдірген.
Жинақталған дәлелдемелерді — скриншоттарды, тексеру хаттамаларын, куәгерлердің жауаптарын және сараптама қорытындысын зерделей келе, сот айыпталушының әрекеті әдейі жасалған деген тұжырымға келген.
Нәтижесінде Солтүстік Қазақстан облысы тұрғыны Қазақстан Республикасы Қылмыстық кодексінің 180-бабы 2-бөлігі бойынша кінәлі деп танылды.
Сот үкімімен оған орташа қауіпсіздік деңгейіндегі мекемеде 5 жыл бас бостандығынан айыру жазасытағайындалды. Әйел сот залында қамауға алынды. Үкім заңды күшіне әлі енген жоқ.