Трамп Ресейге қарсы санкцияларды тағы бір жылға ұзартты
АҚШ бұл шараларды ұлттық қауіпсіздікпен байланыстырып отыр.
SMARTNEWS.KZ басылымының хабарлауынша, АҚШ-тың қазіргі президенті Дональд Трамп Ресейге қарсы санкциялар режимін тағы бір жылға ұзартты.
Бұл шешім Қырым мен Украинаға байланысты бұрын енгізілген шектеулерге қатысты. Атап айтқанда, санкциялар 2014, 2018 және 2022 жылдары қабылданған президенттік жарлықтарға негізделген.
АҚШ билігі құжатта аталған шектеулердің сақталуын былай түсіндіреді:
«Аталған жарлықтарда көрсетілген әрекеттер мен саясат Америка Құрама Штаттарының ұлттық қауіпсіздігі мен сыртқы саясатына әлі де ерекше әрі төтенше қатер төндіреді. Осыған байланысты төтенше жағдай режимі бір жылға ұзартылды».
Аталған санкциялық режим алғаш рет 2014 жылғы 6 наурызда сол кездегі АҚШ президенті Барак Обама тұсында енгізілген.
Кейін бұл режим бірнеше мәрте ұзартылып келген. Ол Ресей азаматтары мен компанияларының активтерін бұғаттауға, сондай-ақ Украинадағы демократиялық институттарға нұқсан келтірді және елдің бейбітшілігіне, қауіпсіздігіне, егемендігі мен аумақтық тұтастығына қатер төндірді деп танылған тұлғаларға шектеу қоюға мүмкіндік береді.
Санкциялар Қырымның аннексиясы мен Украина айналасындағы жағдайға байланысты қабылданған.
Ресми деректерге сәйкес, қазіргі ұзарту шешімі Украина мәселесіне қатысты үшжақты келіссөздер жүріп жатқанына қарамастан қабылданған.
Материал авторы
