Шавкат Рахмоновтың жұбайы апатқа дейін бір жылда 19 рет жол ережесін бұзған

SMARTNEWS.KZ басылымының хабарлауынша, өліммен аяқталған жол-көлік оқиғасына қатысты сотта айыптаушы тарап айыпталушы – Шавкат Рахмоновтың жұбайы апатқа дейінгі бір жыл ішінде жол қозғалысы ережелерін 19 рет бұзғанын мәлімдеді.

Прокурордың дерегінше, тіркелген құқықбұзушылықтардың қатарында жылдамдықты бірнеше рет арттыру, соның ішінде белгіленген межеден 40 шақырымнан аса асыру фактілері бар. Сонымен бірге жол белгілері мен жолақ сызбасын елемеу, тоқтау және тұрақ ережелерін бұзу, көлік құралын белгіленген техникалық талаптарды сақтамай пайдалану жағдайлары анықталған.

Айыптау тарапы қауіпсіздік белдігін тақпау және жарық беру құрылғыларын қолдану талаптарын бұзу деректері де тіркелгенін атап өтті.

Ал қорғау тарапы көлікті тек айыпталушының өзі ғана басқармағанын алға тартты. Адвокаттың айтуынша, сақтандыру полисі бойынша аталған автокөлікті басқаруға Шавкат Рахмонов пен оның ағалары да рұқсат алған. Осыған байланысты жол ережесін бұзу фактілерін басқа адамдар жасауы да мүмкін.

Бұған дейін осы іс бойынша сот процесі Тараз қаласында басталғаны хабарланған. Алдын ала тыңдау қорытындысы бойынша қорғау тарапы істі қосымша тергеп-тексеру үшін кері қайтару туралы өтініш білдірген.

Сондай-ақ жол апатынан қаза тапқан қыздың отбасы айыпталушы – Гүлайымды кешіргенін мәлімдеген.