Алматыда жалған бюллетень туралы ақпарат таратқан әйел жазаланды
Полиция суреттерде дауыс беру парақтары емес, ақпараттық брошюралар болғанын айтты.
SMARTNEWS.KZ басылымының хабарлауынша, Алматыда әлеуметтік желіде дауыс беруге арналған алдын ала толтырылған бюллетеньдер таратылып жатыр деген ақпарат жариялаған әйел әкімшілік жауапкершілікке тартылды.
Қалалық полиция департаментінің мәліметінше, жүргізілген тексеру барысында жарияланған суреттердің дауыс беру бюллетеньдеріне еш қатысы жоқ екені анықталған.
Құқық қорғау органдарының түсіндіруінше, фотосуреттерде көрсетілген материалдар – дауыс беру парақтары емес, ақпараттық жадынамалар мен түсіндірме брошюралар.
Тексеру нәтижесінде жазбаның авторы жалған мәлімет таратқанын мойындаған. Оның әлеуметтік желідегі жарияланымы өшіріліп, әйел әкімшілік жауапкершілікке тартылды.
Полиция азаматтарды тек ресми дереккөздерге сенуге және тексерілмеген ақпаратты таратпауға шақырды. Ведомство ескертуінше, жалған ақпарат тарату заң бойынша жауапкершілікке әкелуі мүмкін, кей жағдайда қылмыстық жаза да қарастырылған.
Айта кетейік, бұған дейін Қазақстанда Конституцияға қатысты референдум өткізуге алдын ала 20,8 млрд теңге жұмсау жоспарланып отырғаны хабарланған. Орталық сайлау комиссиясының мүшесі Михаил Бортниктің айтуынша, бұл қаржы үкімет резервінен бөлінуі мүмкін, себебі 2026 жылғы бюджетте мұндай шығын қарастырылмаған.
Материал авторы
