RUS
SMARTNEWS.KZ басылымының хабарлауынша, Ақмола облысы Щучинск қаласындағы «Центр плова» дәмханасында болған жарылыстан қаза тапқандар саны 11 адамға жетті. Бұл туралы Ақмола облыстық денсаулық сақтау басқармасының басшысы Нариман Ермек айтып берді.
Оның айтуынша, дәрігерлердің барлық күш-жігеріне қарамастан, ауыр жағдайда жатқан тағы екі науқастың өмірін сақтап қалу мүмкін болмаған.
— 8 наурызда «Авиценна-Бурабай» стационарының жансақтау бөлімінде жатқан науқас көз жұмды. Ал 9 наурыз күні Көкшетау қаласындағы Ақмола облыстық көпсалалы ауруханасында ем алып жатқан тағы бір науқас қайтыс болды, — деді басқарма басшысы.
Денсаулық сақтау басқармасы өңір дәрігерлері зардап шеккендердің өмірін сақтап қалу үшін күресті жалғастырып жатқанын мәлімдеді. Медициналық көмек барлық қажетті кадрлық және техникалық ресурстарды тарта отырып көрсетіліп жатыр.
Еске салсақ, 26-27 ақпанға қараған түні Щучинск қаласындағы дәмханада газ баллоны жарылған. Алғашында алты адамның қаза тапқаны хабарланған. Кейін құрбандар саны тоғызға жеткен.
Аталған оқиға бойынша қылмыстық іс қозғалып, «Центр плова» дәмханасының иесі ұсталды. 4 наурыз күні сот шешімімен ол екі айға қамауға алынған.