Медведев АҚШ-тың кесірінен «зомби-апокалипсис» болатынын айтты
Медведевтің айтуынша, әлемде жүздеген әскери-биологиялық зертхана бар.
SMARTNEWS.KZ басылымының хабарлауынша, Ресей Қауіпсіздік кеңесі төрағасының орынбасары, елдің бұрынғы президенті Дмитрий Медведев жаңа биотехнологиялардың қауіпті салдары болуы мүмкін екенін айтып, тіпті «зомби-апокалипсис» сценарийін де жоққа шығармады.
Бұл туралы ол 12 наурызда Эксперт журналы жариялаған «Жаңа технологиялар: аспанға апарар баспалдақ па, әлде тозаққа бастар жол ма?» атты мақаласында жазды.
Медведевтің пікірінше, АҚШ түрлі елдерді тәжірибе алаңы ретінде пайдаланып, «жаһандық әскери-биологиялық желі» құрған. Оның мәліметінше, мұндай инфрақұрылымға Таяу Шығыс, Оңтүстік-Шығыс Азия, Африка және ТМД кеңістігінде орналасқан шамамен 400 қос мақсаттағы зертхана кіреді.
Ол мұндай зерттеулердің нәтижелері эпидемиялардың таралуын бақылауға мүмкіндік береді деп болжайды. Осы тұста Медведев мәдени индустриядағы сценарийлерді мысалға келтіріп, The Last of Us сериалы мен осы аттас бейнеойында көрсетілген «зомби-апокалипсис» идеясы мүлде қиял-ғажайып емес болуы мүмкін екенін айтқан.
Саясаткердің пікірінше, молекулалық биология, вирусология, синтетикалық биология және геномды редакциялау технологияларының дамуы қауіпті салдарға алып келуі ықтимал. Ол жасанды түрде өзгертілген, жұқпалығы жоғары РНҚ-вирустардың пайда болу қаупін де атап өткен.
Сонымен қатар Медведев жаңа патогендер табиғи эпидемия ретінде көрсетіліп, мемлекеттердің шекарасына жақын аймақтарда қолданылуы мүмкін деген болжам айтты.
Алайда жарияланған материалдарда бұл тек Медведевтің жеке ұстанымы екені көрсетілген. Оның АҚШ эпидемиялардың таралуын басқара алады деген немесе мұндай сценарийлерді іске асырып жатыр деген пікірін дәлелдейтін тәуелсіз айғақтар келтірілмеген.
Материал авторы
