«Өзіне қол салмақ болды»: Атырауда ер адам жасөспірімді интернет арқылы қорқытқан

SMARTNEWS.KZ басылымының хабарлауынша, Атырауда әйел өзінің 12 жастағы қызын интернет арқылы қорқытқан және интимдік бейнематериал талап еткен ер адамды әшкереледі.

Жедел ақпаратқа қарағанда, 12 жастағы қыз “Дайвинчик” әлеуметтік желісінде Аза есімді қолданушымен танысқан. Анкетасында оның жасы 15-18 жас деп көрсетілгенімен, кейін ол шын мәнінде ересек адам болып шыққан.

Бірнеше уақыттан соң ер адам қыздан ашық сипаттағы видеолар сұраған. Қыз бас тартқан кезде, ол бұрын алған фотосуреттерін жариялаймын деп қорқытып, жасөспірімді өз-өзіне қол жұмсауға дейін жеткізуге тырысқан. Қыз анасына аудиохабарлама жіберіп үлгеріп, қауіптен аман қалды.

Әйел 102 қызметіне хабарласып, дәлел ретінде хат алмасуларды, қорқыту мәтіндерін, видео мен фотосуреттерді ұсынған. Алайда әлеуметтік желідегі қолданушыны тексеру мүмкін болмағандықтан, полиция интернет арқылы іздеу жүргізе алмайтынын айтып, арыз қабылдаудан бас тартқан.

Содан кейін әйел мәселені өз бетінше шешуге бел буып, желіде 13 жастағы қыз ретінде тіркелген. Қысқа уақыт ішінде Аза есімді адамның анкетасын тауып, бірнеше күннен соң кездесу келісілген.

Кездесуге қыздың анасының туысы барған, ал такси жүргізушісі жағдайды біліп, көмек көрсетуге өз еркімен кіріскен. Кездесуге келген бопсалаушы қыз емес, орта жастағы әйелді көріп, қаша жөнелген. Такси жүргізушісі оны қуып, қолға түсірген.

Ер адамға Қылмыстық кодекстің 121-1-бабы (“16 жасқа толмаған адамға, соның ішінде интернет арқылы сексуалдық сипаттағы ұсыныстар жасау немесе қудалау”) бойынша іс қозғалған. Сотталу кезінде оның әрекеттерінің одан да ауыр қылмыс белгілерін қамтуы мүмкін екені анықталған. Себебі ол тек интимдік ұсыныстар жасап қоймай, қызды қорқытып, өз-өзіне қол салуға дейін жеткізуге тырысқан. Материалдар Атырау қаласының прокурорына тергеу үшін жолданған.

Айта кетейік, іс бір жылға жуық уақыттан бері қаралып келеді. Қазіргі кезде күдікті бостандықта жүр, тек тергеу немесе сотқа шақырылғанда қатысу міндеті бар.