Астанада капитан өз бастығын соққыға жығып, сотталды

SMARTNEWS.KZ басылымының хабарлауынша, Астанада полиция капитаны өз басшысына қол көтергені үшін сотталды. Есіл аудандық жергілікті полиция қызметі басшысының орынбасары болған қызметкерге қатысты үкім шығарылды.

Іс құжаттарына сәйкес, Абетаев А. Есіл аудандық полиция бөліміндегі жергілікті полиция қызметі басшысының орынбасары қызметіне өткен жылдың маусым айында тағайындалған.

Шілде айының басында ол кезекшілікке жауапты қызметкер ретінде түскен. Сол күні шамамен 22:40-та бөлім басшысы, майор Ноғаев С.А. Астана полиция департаменті басшылығының тапсырмасымен ойын-сауық орындарын тексеруге шыққан.

Осы уақытта Абетаев басшысына бірнеше рет қоңырау шалған. Алайда Ноғаевтың телефоны жұмыс істемей, байланысқа шығу мүмкін болмаған.

Тергеу материалдарында көрсетілгендей, қоңыраулар жауапсыз қалған соң Абетаевта қызметтік өкілеттігін асыра пайдалану ниеті туындаған.

Кейінірек ол Ногаевпен байланысқа шығып, бір ойын-сауық мекемесінің жанына келуін сұраған. Сол жерде олардың арасында жанжал туындап, Абетаев басшысына жұдырық жұмсап, беті мен басынан бірнеше рет соққы жасаған.

Сот мәліметіне қарағанда, майор соққылардан есінен танып қала жаздап, шабуылды тоқтатуға тырысқан. Екеуі бір-біріне жармасып, көліктердің арасындағы жерге құлаған. Бірақ Абетаев мұнымен тоқтамай, қарсыласының беті мен басынан тағы соққы жасап, арт жағынан мойнынан қысып, тұншықтыру әдісін қолданған.

Оқиға салдарынан Ноғаев ауруханаға жеткізілген. Медициналық сараптама оның маңдайында жарақат, ерінінің жыртылуы және мұрын сүйегінің сынуы бар екенін анықтады. Бұл жарақаттар денсаулыққа жеңіл зиян ретінде бағаланған.

Сот Абетаевты қасақана жеңіл дене жарақатын салды деп таныды. Оған бір жыл мерзімге бостандығын шектеу жазасы тағайындалып, 100 сағат қоғамдық жұмыс істеу міндеттелді. Сонымен қатар ол капитан шенінен айырылып, жәбірленушіге 3 млн теңге өтемақы төлеуге міндеттелді.

Үкім әзірге заңды күшіне енген жоқ.