Жамбыл облысында әйел Instagram-да жала жапқаны үшін жазаланды

SMARTNEWS.KZ басылымының хабарлауынша, Жамбыл облысының тұрғыны әлеуметтік желідегі жазбаларға байланысты сотқа жүгініп, өз ар-намысы мен іскерлік беделін қорғауды талап етті. Даулы жазбалар Instagram платформасында жарияланған. Бұл туралы Қазақстан Жоғарғы сотының баспасөз қызметі жазды.

Талапкердің айтуынша, аккаунт иесі ол туралы екі рет жалған ақпарат таратып, оның абыройына нұқсан келтірген.

Ер адам соттан жарияланған мәліметтерді теріске шығаруды және кешірім сұратуды талап еткен. Алайда жауапкер бұл талаппен келіспей, жазбалар тек жеке пікір екенін, олар туындаған жанжал аясында айтылған бағалау сипатындағы сөздер екенін мәлімдеген.

Қордай аудандық соты жарияланымдарда қорлайтын немесе нақты фактілерді бұрмалаған мәлімет жоқ деген қорытындыға келіп, талапты қанағаттандырудан бас тартты.

Бұл шешіммен келіспеген талапкер апелляциялық шағым түсірді. Істі қайта қараған Жамбыл облыстық соты бірінші инстанцияның қорытындысымен келіспеді.

Сот алқасының пікірінше, жарияланған сөздер болжам немесе пікір емес, нақты факт ретінде берілген және талапкердің ар-намысы мен іскерлік беделіне нұқсан келтіреді. Сондықтан олар шындыққа сәйкес келмейтін мәлімет деп танылды.

Сот бірнеше тұжырымды бөлек қарастырып, олардың шындыққа сәйкес келмейтінін анықтады. Атап айтқанда:

«көп адамды алдаған»;

«кейбір адамдар оның кесірінен түрмеге түскен»;

«қорқыту үшін адамдар жіберген».

Апелляциялық сот мұндай сөздер қарапайым пікір емес, нақты факт ретінде қабылданатынын атап өтті.

Нәтижесінде бірінші инстанцияның шешімі өзгертілді. Сот жауапкерді Instagram парақшасында жариялаған ақпаратты теріске шығаруға міндеттеді.

Сондай-ақ сот бұл мәліметтердің шындыққа сәйкес келмейтінін ресми түрде таныды. Сот қаулысы заңды күшіне енді.