Ақтөбеде рейстік автобус жүргізушісі жолаушыларды айдалада түсіріп кеткен
Далада қалғандардың арасында балалар да болған.
SMARTNEWS.KZ басылымының хабарлауынша, Ақтөбе облысында рейстік автобус жүргізушісінің әрекеті қоғамның ашуын туғызды. Ол жолаушыларды, оның ішінде балаларды, межелі жерге жеткізбей, ашық далада түсіріп кетіп, өзі қайтадан Ақтөбеге оралған.
Жолаушылардың айтуынша, 17 наурыз күні автобус Хромтауға небәрі бес шақырым қалғанда тоқтап, барлық адамды түсіріп кеткен. Сол сәтте ішінде кішкентай балалар да болған.
Куәгерлердің бірі мұндай әрекетті «жабайылық» деп бағалап, адамдардың қауіпсіздігіне тікелей қатер төнгенін айтты.
Алдын ала мәлімет бойынша, жүргізуші бұл шешімді тұманға байланысты қабылдаған. Алайда ол жолаушыларды елді мекенге жеткізбей, далада қалдыруды жөн көрген.
Тасымалдаушы компания өкілі бұл әрекеттің орынсыз екенін ашық мәлімдеді. Компанияның айтуынша, мұндай жағдайда қозғалысқа шектеу енгізілуі мүмкін, бірақ жолаушыларды елді мекеннен тыс жерде қалдыруға жол берілмейді.
Сондай-ақ, жүргізуші бұл шешімді басшылықпен келіспей, өз бетінше қабылдағаны анықталған.
Компания өкілдері жүргізушінің әрекеті ішкі ережелер мен жолаушылар тасымалы талаптарын өрескел бұзатынын атап өтті. Оған қатысты тәртіптік жаза қолданылатыны белгілі болды.
Қосымша ретінде барлық жүргізушілерге қауіпсіздік талаптарын қатаң сақтау жөнінде қайта нұсқама жүргізілмек.
Материал авторы
