Нетаньяху: Иран енді уран байытып, зымыран өндіре алмайды
Израиль Иранның өндірістік базасын жоюды жалғастырып жатыр.
SMARTNEWS.KZ басылымының хабарлауынша, Израиль премьер-министрі Биньямин Нетаньяху Иранның ядролық және зымырандық әлеуетіне ауыр соққы жасалғанын мәлімдеді. Бұл туралы ол АҚШ–Израиль бірлескен операциясы басталғалы бергі алғашқы баспасөз мәслихатында айтты.
Нетаньяхудың сөзінше, «Арыстанның өрлеуі» операциясы аясында Иранның зымырандары мен ядролық инфрақұрылымының едәуір бөлігі жойылған. Қазір Израиль тарапы зымыран мен ядролық қаруға қажетті компоненттер шығаратын зауыттарды нысанаға алып, өндірістік базасын жүйелі түрде талқандауды жалғастырып жатыр.
Премьер-министр бұл әрекеттер бұрын-соңды болмаған ауқымда жүргізіліп жатқанын атап өтті.
Израиль АҚШ-ты қақтығысқа тартты деген пікірлерге жауап берген Нетаньяху мұндай тұжырымды жоққа шығарды. Оның айтуынша, Дональд Трамп шешімдерді тек АҚШ мүддесіне сай қабылдайды және ешкімнің ықпалына көнбейді.
Сонымен қатар, ол Ирандағы «Оңтүстік Парс» газ кенішіне жасалған соққыға қатысты да пікір білдірді. Нетаньяху Израиль бұл операцияны дербес жүргізгенін айтып, Трамптың болашақта мұнай-газ нысандарына соққы бермеуді сұрағанын жеткізді. Оның сөзінше, Израиль бұл өтінішті ескеріп отыр.
Баспасөз мәслихатында Ормуз бұғазы төңірегіндегі ахуал да қозғалды. Қақтығыс басталғалы бері бұл маңызды теңіз дәлізі іс жүзінде жабық тұр. Нетаньяху мәселені шешудің балама жолын ұсынып, мұнай мен газды Таяу Шығыстан Израильдің Жерорта теңізіндегі порттарына тікелей жеткізетін құбыр желісін салуды ұсынды.
Айта кетейік, бұған дейін Дональд Трамп әлеуметтік желідегі жазбасында АҚШ Израильдің «Оңтүстік Парс» кенішіне жасаған соққысы туралы алдын ала білмегенін мәлімдеген еді.
Материал авторы
