Иран АҚШ пен Израиль университеттеріне соққы жасайтынын айтты

SMARTNEWS.KZ басылымының хабарлауынша, Батыс Азияда жағдай тағы да шиеленісе түсті. Иран билігі АҚШ пен Израильдің өңірдегі университеттеріне соққы беруі мүмкін екенін мәлімдеді. Бұл – Ирандағы екі жоғары оқу орнына жасалған шабуылға жауап ретінде айтылған қатаң ескерту.

Иранның Ислам революциясы сақшылары корпусы (КСИР) АҚШ-қа нақты талап қойды. Егер Вашингтон өз әуе соққыларын айыптамаса, өңірдегі америкалық университеттер жауап соққыларынан тыс қалмайды. Тегеран бұл үшін 30 наурыз түске дейін уақыт берген.

Сонымен қатар, өңірдегі америкалық университеттердің қызметкерлері мен студенттеріне, сондай-ақ жақын маңдағы тұрғындарға кампустардан кемінде бір шақырым қашық жүру ұсынылған.

Иран тарапының мәліметінше, шабуыл Исфахан техникалық университеті мен Тегеран ғылым және технология университетіне жасалған. Бұл оқиғадан кейін жағдай күрт ушығып отыр.

Аймақта АҚШ университеттерінің бірнеше филиалы бар. Атап айтқанда, Катардағы Texas A&M университеті және Біріккен Араб Әмірліктеріндегі Нью-Йорк университеті өңірдегі ірі білім ошақтарының қатарында.

Осы ахуал аясында Ливандағы Американдық университет Бейрут уақытша онлайн оқытуға көшетінін жариялады. Университет басшылығы нақты қауіп дәлелденбегенін айтқанымен, сақтық шараларын күшейткен.

Иран Сыртқы істер министрлігінің өкілі Эсмаил Багаи АҚШ пен Израильдің әрекетін «елдің ғылыми әлеуетін әлсіретуге бағытталған» деп бағалады. Оның сөзінше, университеттер мен ғылыми орталықтарға соққы жасау – жүйелі қысымның белгісі.

Еске салайық, 28 ақпанда АҚШ пен Израиль Иран аумағына әуе соққыларын жасаған. Бұған жауап ретінде Тегеран Израильге, Парсы шығанағындағы бірқатар елдерге және аймақтағы америкалық нысандарға зымыран және дрондармен шабуыл ұйымдастырған.

Қазір өңірдегі жағдай тұрақсыз күйде қалып отыр, ал тараптар арасындағы текетірес жаңа деңгейге көтерілгені байқалады.