RUS
SMARTNEWS.KZ басылымының хабарлауынша, Өскемен қаласының экс-әкімі Жақсылық Омар сот үкімімен 6 жылға бас бостандығынан айырылды. Ол жазасын орташа қауіпсіздік деңгейіндегі мекемеде өтейтін болады.
Сот оны алаяқтық және пара алу баптары бойынша кінәлі деп таныды. Қылмыстық іс оның Өскемен қаласының әкімі әрі Шығыс Қазақстан облысы әкімінің бірінші орынбасары қызметін атқарған кезеңіне қатысты.
Тергеу материалдарына сәйкес, айыпталушы бір эпизодта 2021 жылы шыққан, құны шамамен 13 млн теңге болатын Toyota Camry автокөлігін материалдық көмек ретінде рәсімдеп алған. Кейін бұл көлік үшінші тұлғаның атына аударылып, басқа көлікке айырбасталған.
Тағы бір жағдайда ол әкімдік қызметкерінен 20 млн теңге талап еткен. Қызметкер бұл туралы Ұлттық қауіпсіздік комитетіне хабарлағаннан кейін барлық әрекеттер бақылауға алынған. Нәтижесінде делдал арқылы берілген 6 млн теңгенің 5,6 млн теңгесі ұсталу сәтінде тәркіленген.
Іс жеделдетілген тәртіппен қаралып, сот үкімі шығарылды.