RUS
SMARTNEWS.KZ басылымының хабарлауынша, наурыз айында Ақтөбе және Хромтау қалаларында екі қылмыстық топтың жұмыс істеп, шахтерлерден заңсыз ақша талап еткен фактілері анықталды.
Ішкі істер министрлігінің мәліметінше, Хромтау қаласында жергілікті қылмыстық топ мүшелері шахтерлерді қорқытып, күш қолдану арқылы ақша талап еткен. Жәбірленушілер қауіптеніп, құқық қорғау органдарына жүгінбеген.
Полиция күдіктілердің толық құрамын анықтап, сенімді дәлелдер жинаған соң, барлық қатысушыларды бір мезгілде ұстаған.
«20 санкцияланған тінту шарасы барысында ақша және басқа да заттай дәлелдер тәркіленді. Ақтөбеде де ұқсас қылмыстық әрекеттер тоқтатылды. Онда қылмыскерлер ойын-сауық орындарының қауіпсіздік қызметіне қысым көрсетіп, ақша талап еткен және заңсыз қорғаншылық ұсынған. Барлық қатысушылар ұсталтып, уақытша ұстау изоляторына орналастырылды», – деп хабарлады ІІМ.
Қазіргі таңда ұсталғандар басқа ұқсас қылмыстарға қатысы бар-жоғы тексеріліп жатыр.
«Барлық фактілер бойынша бопсалау ісі қозғалды. Сонымен қатар, заңсыз тұтқындау және еркінен айыру деректері бойынша тексеру жүргізіліп жатыр», – деп толықтырды ведомство.
ІІМ атап өткендей, азаматтардан түскен сигналдар қылмыстық топтарды бейтараптандыруға, ауыр салдардың алдын алуға және азаматтардың құқықтарын қорғауға мүмкіндік берді. Бұл бағыттағы жұмыс жалғасуда.