RUS
SMARTNEWS.KZ басылымының хабарлауынша, белгілі продюсер, әнші Қайрат Нұртастың әкесі Нұртас Айдарбеков тіл мәселесіне қатысты ашық пікір білдіріп, қоғамдағы ахуалды сынға алды.
Аман Тасығанға берген сұхбатында ол немерелерінің күнделікті өмірде орысша сөйлейтінін жасырмады. Айтуынша, өзі қасында болғанда балалар қазақша сөйлеуге тырысады, бірақ орта өзгерген сәтте қайтадан орыс тіліне көшеді.
«Мен барғанда немерелерім қазақша сөйлеуге ұмтылады. Білмесе де, барынша қазақша жауап беруге тырысады. Бірақ мен кеткен соң қайтадан орысша сөйлейді. Себебі аулада қазақша сөйлейтін орта жоқ. Егер орысша білмесе, басқа балалармен араласа алмайды», – деді ол.
Айдарбеков бұл құбылыстың басты себебі отбасы ішіндегі тілдік орта екенін атап өтті. Оның сөзінше, ата-аналар мен келіндерінің өзі көбіне орысша сөйлейтіндіктен, бала да сол тілді таңдайды.
Сұхбат барысында ол мәселені шешудің жолын да ұсынды. Оның пікірінше, тіл саясаты заңмен күшейтілмейінше, жағдай өзгермейді. Бұл ретте ол бұрын көлігіндегі қара әйнекті заң талаптарына сай алып тастауға мәжбүр болғанын мысалға келтіріп, дәл осындай қатаң талап тілге де қажет екенін айтты.