RUS
SMARTNEWS.KZ басылымының хабарлауынша, Ақмола облысында гидротехникалық нысанның бұзылуы тіркелді. Қорғалжын ауданына қарасты Сабынды ауылы маңындағы Шоптыкөл бөгеті бұзылып, су айналасындағы аумақтарға жайылған.
Тасқын су «Астана — Қорғалжын» республикалық маңызы бар автожолының 75-шақырым тұсын кесіп өткен. Алайда су жолдың жүру бөлігіне жетпеген, қозғалысқа қауіп төнген жоқ.
«ҚазАвтоЖол» мәліметінше, жағдай бақылауға алынып, жедел әрекет ету шаралары іске қосылған. Оқиға орнына 14 бірлік арнайы техника мен 30-дан астам маман жұмылдырылды. Қазір инертті материалдарды дайындау және жеткізу жұмыстары үздіксіз жүргізіліп жатыр.
Маңыздысы — аталған аумақтағы үш көзді су өткізу құбыры штаттық режимде жұмыс істеп тұр. Бұл судың кедергісіз өтуіне мүмкіндік беріп, жол инфрақұрылымын сақтап қалуға сеп болған.
Қазіргі уақытта жол жамылғысы зақымданбаған. Көлік қозғалысы шектелмеген және қалыпты режимде жалғасуда.