RUS
SMARTNEWS.KZ басылымының хабарлауынша, Мәжіліс депутаттары Экологиялық кодекске өзгерістерді мақұлдап, бұл мұнай мен басқа да пайдалы қазбаларды барлауды және онымен байланысты мемлекеттік реттеуді айтарлықтай жеңілдетеді. Бұл туралы PetroMining НДО Telegram-арнасы жазды.
Жаңа түзетулер бірнеше маңызды жаңалықты қамтиды. Енді пайдалы қазбаларды барлау жобалары әрдайым қоршаған ортаға орташа әсер ететін нысандар (екінші категория) қатарына жатқызылады. Бұл ретте мемлекет оларды экологияға қалыпты әсер ететін нысандар ретінде таниды. Экологиялық кодексте барлығы төрт категория қарастырылған – үлкен теріс әсерден ең төменгі әсерге дейін. Категорияға байланысты кәсіпорындар зиянды қалдықтар үшін әртүрлі мөлшерде төлем жасайды, ал төртінші категория үшін төлем қажет емес.
Қазіргі редакция бойынша барлау жобалары бірінші категорияға жатады. Енді оларды екінші категорияға ауыстыру арқылы (теңіз жобалары қоспағанда) қалдыққа төлем мөлшері азаяды.
Сондай-ақ, теңізден басқа жердегі барлау жобалары міндетті қоғамдық тыңдаулардан, кейбір бюрократиялық рәсімдерден босатылды: қоршаған ортаға әсерді бағалау, жоспарланған қызмет туралы өтініш беру және мемлекеттік экологиялық сараптамадан өту.
Жұмыс мерзімі өзгеретін жобалар қайта экологиялық сараптамадан өтпейді. Оларға рұқсат үш күн ішінде жедел түрде беріледі. Қоғамдық тыңдаулардың мерзімі 30 күннен 15 күнге, экологиялық рұқсат алу мерзімі 45 күннен 10 күнге, скрининг 22 күннен 10 күнге қысқарды.
Өзгерістерді Мәжіліс жұмыс тобы қарап, мақұлдады. Енді олар төменгі палатаның сессиясына шығарылады.
Мұнай-газ саласының сарапшысы, Energy Monitor Telegram-арнасының авторы Нұрлан Жұмағұлов түзетулерді геологиялық барлау саласы үшін өте маңызды деп бағалайды. Оның айтуынша, кәсіпорындар жиі жергілікті тұрғындардың кедергісіне тап болып, сейсморазведка мен бұрғылау жұмыстарын жүргізе алмай жатады, тіпті лицензиясы аукцион арқылы алынған учаскелерде де.
«Сен «қаптағы мысықты» алуың мүмкін, бірақ жергілікті белсенділермен келісу керек болады, кейде келісімнің құны қосымша бонус мөлшерінен асып кететін», – дейді Жұмағұлов.
Оның пікірінше, қоғамдық талқылаулар қазбаларды тауып, өнеркәсіптік пайдалануға көшу кезеңінде ғана мағыналы.