RUS
SMARTNEWS.KZ басылымының хабарлауынша, Иран Сыртқы істер министрлігінің ресми өкілі Исмаил Бағаи АҚШ-тың құтқару операциясы шын мәнінде уранды алып кетуге бағытталған болуы мүмкін екенін мәлімдеді.
Бағаидің айтуынша, америкалық ұшқыштарды құтқару миссиясы бүркеніш қана болуы ықтимал. Оның сөзінше, бұл операция Иранның байытылған уранын қолға түсіруге бағытталған әрекет болуы мүмкін, алайда жоспар іске аспаған.
«Бұл әрекет алдамшы маневр ретінде уранды ұрлауға бағытталған болуы мүмкін деген нұсқаны жоққа шығаруға болмайды», – деді Иран СІМ өкілі.
Ол сондай-ақ АҚШ-тың бұл миссиясын 1980 жылы сәуірде Тегеранда кепілге алынғандарды босату үшін жүргізілген «Бүркіт тырнағы» операциясымен салыстырды. Сол кезде америкалық тарап бірнеше әуе техникасынан айырылып, сегіз адам қаза тапқан еді.
Соңғы күндері Иран аумағында америкалық бомбалаушы ұшақтың атып түсірілгені туралы ақпарат тарады. Кейбір мәліметтерге қарағанда, ұшқыштардың бірі тұтқынға алынған. Тіпті әскери қызметкерлер үшін сыйақы жарияланғаны да хабарланды. Ал америкалық БАҚ-та олардың бірін құтқару туралы ақпарат шықты.
АҚШ президенті Дональд Трамп екі ұшқыштың құтқарылғанын мәлімдеп, операциялар шығынсыз өткенін айтты.
Ал Иран тарапы бұл миссия барысында АҚШ әскері екі Black Hawk тікұшағы мен С-130 әскери-көлік ұшағынан айырылғанын алға тартты.