RUS
SMARTNEWS.KZ басылымының хабарлауынша, Венгрия үкіметі Ресеймен экономикалық, энергетикалық және мәдени байланыстарды кеңейтуге бағытталған келісімге қол қойғаны белгілі болды. Бұл туралы Politico басылымы Ресей үкіметінің құжаттарына сілтеме жасап хабарлады.
Мәліметке сәйкес, келісім өткен жылдың желтоқсанында Мәскеуде өткен келіссөздер қорытындысы бойынша бекітілген. Құжатқа Венгрияның сыртқы істер министрі Петер Сийярто мен Ресейдің денсаулық сақтау министрі Михаил Мурашко қол қойған. Бұған дейін бұл келісімнің мазмұны жария етілмеген.
Құжат 12 тармақтан тұрады және ядролық отын, мұнай-газ, энергетика, білім беру, спорт секілді бірнеше саланы қамтиды. Келісім аясында тараптар санкциялар салдарынан әлсіреген сауда қатынастарын қалпына келтіруді көздейді. Сонымен қатар Ресей компанияларына Венгрияда энергетика және сутегі жобаларын жүзеге асыруға мүмкіндік беру қарастырылған.
Бұдан бөлек, Венгрия орыс тілін оқытуды күшейту үшін Ресейден мұғалімдер тарту мүмкіндігін қарастыруға келіскен. Академиялық алмасу бағдарламаларын кеңейту, спорт пен мәдениет саласындағы ынтымақтастықты арттыру да жоспарға енгізілген.
Сонымен қатар құжатта бұл келісім Венгрияның Еуроодақ алдындағы міндеттемелеріне қайшы келмеуі тиіс екені атап өтілген.
Сарапшылардың пікірінше, бұл келісім ел ішіндегі саяси күресте маңызды құралға айналып отыр. Оппозиция өкілдері билікті Ресеймен тым жақындасты деп айыптаса, үкімет бұл қадамды ұлттық мүдде тұрғысынан түсіндіруде.
Венгрияда 12 сәуірде парламенттік сайлау өтеді. Politico мәліметінше, премьер-министр Виктор Орбан үшін бұл соңғы жылдардағы ең күрделі саяси сынақ болуы мүмкін. Сауалнамаларға сәйкес, оның «Фидес» партиясы оппозициялық «Тиса» партиясынан жеңіліп қалуы ықтимал.