RUS
SMARTNEWS.KZ басылымының хабарлауынша, Астанадағы емханалардың бірінде бюджет қаражатын жымқыру дерегі бойынша сотқа дейінгі тергеу басталды. Прокуратура мәліметінше, тексеріс нәтижесінде 675 миллион теңгеден астам қаржының заңсыз шығарылғаны анықталған.
Тергеу нұсқасына сәйкес, медициналық мекеменің бұрынғы басшылығы ұзақ уақыт бойы азаматтарды емдеуге бөлінген қаражатты жүйелі түрде қолды еткен. Қаржы жақын туыстар мен аффилирленген тұлғалардың есепшоттарына аударылып, заңды операциялар ретінде бүркемеленген.
Жымқырылған қаражаттың бір бөлігі қымбат тұрмыстық техника алуға және Италияға туристік сапарларға жұмсалғаны айтылып отыр.
Аталған дерек бойынша Қылмыстық кодекстің 189-бабы 4-бөлігі – аса ірі көлемдегі ұрлық фактісімен іс қозғалды. Қазіргі уақытта арнайы прокурорлар тергеу әрекеттерін жүргізіп жатыр.
Айта кетейік, бұған ұқсас іс биыл қаңтар айында да тіркелген болатын. Ол кезде екі жекеменшік клиниканың басшысы Әлеуметтік медициналық сақтандыру қорынан 682 миллион теңге жымқырды деген күдікке ілінген. Тергеу мәліметінше, жүйеге шын мәнінде қызмет алмаған науқастар туралы жалған деректер енгізіліп отырған. Күдіктінің мүлкіне сол кезде тыйым салынған.