RUS
SMARTNEWS.KZ басылымының хабарлауынша, Ресей президенті Владимир Путин православ Пасха мерекесіне орай Украинамен уақытша бітім жариялады. Кремльдің хабарлауынша, атысты тоқтату 11 сәуір күні Мәскеу және Киев уақытымен сағат 16:00-де басталып, 12 сәуірдің соңына дейін жалғасады.
Ресми мәліметте қорғаныс министрі Андрей Белоусов пен Бас штаб бастығы Валерий Герасимов-қа барлық бағытта әскери әрекеттерді уақытша тоқтату туралы тапсырма берілгені айтылған. Сонымен қатар әскерге қарсы тараптан болуы мүмкін кез келген арандату әрекеттеріне дайын болу міндеттелген. Мәскеу бұл қадамға Киев те жауап береді деген үміт білдірген.
Айта кетейік, бұған дейін Украина президенті Владимир Зеленский бірнеше рет Пасха кезінде атысты тоқтатуды ұсынған. Алайда оның сөзінше, Ресей бұл бастамаларға нақты келісім бермеген. Дегенмен, соңғы мәлімдемесінде Зеленский Киевтің «айна қағидасы бойынша» әрекет етуге, яғни бітімге жауап ретінде дәл сондай қадам жасауға дайын екенін жеткізді.
«Адамдарға қауіп-қатерсіз Пасха керек. Бұл — бейбітшілікке нақты қадам жасауға мүмкіндік. Ресейде Пасхадан кейін де оқ атуды тоқтатуға мүмкіндік бар», — деді Украина басшысы.
Еске салсақ, мұндай «пасхалық бітім» 2025 жылы да жарияланған еді. Ол кезде тараптар атысты уақытша тоқтатуға келіскенімен, араға бір күн салып Киев пен Мәскеу бір-бірін келісімді бұзды деп айыптаған.