RUS
SMARTNEWS.KZ басылымының хабарлауынша, қазақстандық боксшы Бақыт Сейдіш Азия чемпионатының финалында алтынға бір табан жақындап барып, күміспен шектелді. Моңғолияда өткен құрлық біріншілігінде 70 келіге дейінгі салмақта өнер көрсеткен 21 жастағы спортшы шешуші жекпе-жекте Үндістан өкілі Арундхати Чоудхаримен қолғап түйістірді. Тартысты өткен айқаста басымдық қарсыласқа беріліп, Сейдіш турнирдің күміс жүлдегері атанды.
Жекпе-жектен кейін боксшы өз ойымен ашық бөлісті. Ол бұл жарысқа тек жеңіс үшін келгенін, бар күшін салғанын айтты. Алайда қарсыласының мықтылығын мойындап, екінші орын көңілінен шықпағанын жасырмады. Себебі басты мақсат — алтын медаль болған.
Спортшының осы шынайы сөзі көпшіліктің көңіліне тиді. Әлеуметтік желіде қазақстандықтар оны нағыз чемпион деп атап, қолдау білдірді. Көпшілік оның әлі талай биікті бағындыратынына сенім білдіріп, тоқтамауға шақырды.
Айта кетейік, Азия чемпионатының финалына Қазақстан құрамасынан барлығы сегіз спортшы шықты. Оның бесеуі ерлер, үшеуі әйелдер құрамасының өкілдері.