RUS
SMARTNEWS.KZ басылымының хабарлауынша, АҚШ президенті Дональд Трамп бастамашы болған «Бейбітшілік кеңесіне» уәде етілген миллиардтаған қаржы толық түспей жатыр. Соның салдарынан Газада басқару құрылымын іске қосу мен қарусыздану келіссөздері тежеліп отыр.
Reuters агенттігінің дерегінше, қаржылай қолдау көрсетуге уәде берген тоғыз елдің ішінде нақты қаражат бөлгендері — Біріккен Араб Әмірліктері, Марокко және АҚШ-тың өзі. Жалпы жиналған сома 1 миллиард доллардан да аспаған.
Ақпан айында Вашингтонда өткен жиында Трамп ұйымға мүше елдер — Қазақстан, Әзербайжан, БАӘ, Марокко, Бахрейн, Қатар, Сауд Арабиясы, Өзбекстан және Кувейт — Газа секторына 7 миллиард доллар бөлуге келіскенін жариялаған еді. Бұған қоса АҚШ тағы 10 миллиард, ал БҰҰ 2 миллиард доллар қосуды жоспарлаған. Бұл қаражат «Бейбітшілік кеңесінің» бақылауындағы Газаны басқару жөніндегі ұлттық комитетті қаржыландыруға бағытталуы тиіс болған. Жоспар бойынша, бұл құрылым ХАМАС қарусызданғаннан кейін өңірдегі билікті өз қолына алуы керек еді.
Алайда ұйым өкілдері қаржы тапшылығы туралы ақпаратты жоққа шығарып отыр.
«Қаржыландыруға шектеу жоқ, барлық өтінімдер толық әрі дер кезінде қамтамасыз етіледі», — деп мәлімдеді кеңес.
Соған қарамастан, келіссөздер тұйыққа тірелген. Египеттің арағайындығымен жүріп жатқан ХАМАС-ты қарусыздандыру мәселесі нәтиже бермей отыр. Израиль қаруды толық тапсыруды талап етсе, ХАМАС атысты тоқтату мен әскердің толық шығуына кепілдік сұрайды.
Дипломатиялық дереккөздердің айтуынша, қазіргі жағдай күрделене түскен. Израиль бұл тығырықты жаңа әскери операцияны қайта бастауға себеп ретінде пайдалануы мүмкін деген қауіп бар.