RUS
SMARTNEWS.KZ басылымының хабарлауынша, Астанада болған алапат өрттің жаңа жайттары белгілі болды. Қайғылы оқиғада үш бала қаза тапқан еді. Енді көрші әйел сол түндегі алғашқы сәттерді айтып берді.
Оның сөзінше, өрт түн ортасында, тұрғындардың басым бөлігі ұйқыда жатқан кезде тұтанған. Әйел алдымен әлдебір сықырлаған дыбыстан оянып, оны электр желісіндегі ақау деп ойлаған. Алайда көп ұзамай пәтерін түтін басып, көрші жақтан ыңырсыған дыбыстар естіген.
Ол бірден баспалдақ алаңына шығып, өрттің көрші пәтерден шыққанын аңғарған. Әйел есіктерді қағып, тұрғындарды оятуға тырысқанымен, қою түтін мен түнгі уақыт жағдайды қиындатқан.
Көп ұзамай оқиға орнына өрт сөндірушілер келіп, адамдарды эвакуациялай бастаған. Куәгер олардың жедел әрекет еткенін айтады. Тұрғындардың барлығы сыртқа шығарылып, подъезд іші түтінге толған.
Алайда өртті сөндіру жұмыстары бірден басталмаған. Себебі үйдің кіреберісін көліктер жауып, арнайы техниканың жақындауына кедергі келтірген. Кейін жүргізуші табылып, жол ашылған соң ғана құтқарушылар толыққанды жұмысқа кіріскен.
Өрт шыққан пәтерден күйік алған әйел құтқарылып, ауруханаға жеткізілді. Алғашында тұрғындар адам шығыны жоқ деп үміттенгенімен, кейін үш баланың қаза тапқаны белгілі болды. Алдын ала мәлімет бойынша, олар түтіннен уланып көз жұмған.
Куәгердің айтуынша, өрттен кейін подъезд іші танылмастай күйге түскен: қабырғалар күйемен қарайған, су мен сынған заттар шашылып жатқан, күйік иісі қолқаны қапқан.
Бұл жағдай қоғамда үлкен резонанс тудырып, қауіпсіздік мәселесін қайта күн тәртібіне шығарды. Әсіресе, өрт кезінде әр секундтың маңызды екені және ауладағы бей-берекет тұрақтың адам өміріне тікелей қауіп төндіретіні тағы дәлелденді.
Сонымен қатар, әлеуметтік желі қолданушылары өрттің алдын алу үшін түтін датчиктерін орнату қажеттігін алға тартуда. Қазіргі технологиялар мұндай қайғылы жағдайлардың алдын алуға мүмкіндік береді.