RUS
SMARTNEWS.KZ басылымының хабарлауынша, Павел Дуров танымал мессенджер WhatsApp-қа қатысты өткір мәлімдеме жасап, сервисті «ауқымды тұтынушылық алаяқтық» деп атады. Оның айтуынша, миллиондаған қолданушының жеке хат-хабарлары шын мәнінде толық қорғалмаған.
Кәсіпкердің сөзінше, WhatsApp-тағы жеке жазбалардың шамамен 95 пайызы резервтік көшіру жүйесі арқылы ақыр соңында Apple мен Google серверлерінде шифрланбаған күйде сақталады.
Дуров негізгі мәселені «бұлттағы» көшірмелерден көреді. Оның айтуынша, WhatsApp-та резервтік деректерді шифрлау мүмкіндігі бар болғанымен, ол міндетті емес, ал қолданушылардың басым бөлігі оны қоспайды.
«Тіпті өз деректеріңізді құпиясөзбен қорғасаңыз да, бұл толық қауіпсіздікке кепіл болмайды. Себебі сізбен хат алмасатын адамдардың 90 пайыздан астамы мұндай қорғауды қолданбайды. Соның салдарынан мәліметтер бәрібір ашық күйде бұлтқа түседі», – дейді ол.
Сонымен қатар, Дуровтың пікірінше, Apple мен Google компаниялары WhatsApp-тағы резервтік көшірмелерді жылына мыңдаған рет үшінші тараптарға ұсынуы мүмкін. Бұдан бөлек, мессенджер қолданушының кіммен және қаншалықты жиі байланыс орнататыны туралы мәліметтерді де сақтайды.
Осы тұста ол өз өнімі — Telegram-ды мысалға келтіріп, қауіпсіздік деңгейі жоғары екенін атап өтті.
«Telegram 12 жыл ішінде пайдаланушылардың бірде-бір хабарламасын жария еткен емес», – деп түйіндеді Дуров.
Айта кетейік, ол бұған дейін де WhatsApp-тан бас тартып, қауіпсіз баламаларға көшуге бірнеше рет шақырған. Оның пікірінше, америкалық мессенджердің қауіпсіздік архитектурасында елеулі осал тұстар бар.