RUS
SMARTNEWS.KZ басылымының хабарлауынша, Ақмола облысында суррогат анаға қатысты даулы іс сотта қаралып, нүкте қойылды. Ақша алып, келісілген рәсімге келмеген әйел енді шығынды толық қайтаруға міндеттелді.
Іс материалдарына сәйкес, 2024 жылы ерлі-зайыптылар азаматша Д.-мен суррогат ана болу жөнінде келісімшарт жасаған. Құжатта екі рет ұрықтандыру әрекеті қарастырылған.
Алғашқы әрекет сәтсіз аяқталғаннан кейін, жұп екінші кезеңге дайындықты жалғастырып, әйелге медициналық тексерулерге, дәрі-дәрмекке, жол шығындары мен күшейтілген тамақтануға 500 мың теңгеден астам қаражат аударған.
Алайда 2025 жылдың наурызында екінші процедура өтпей қалған. Себебі суррогат ана клиникаға келмеген. Кейін ол бұл әрекетін денсаулығына байланысты қарсы көрсетілімдермен түсіндіруге тырысқан. Дегенмен сот бұл уәждерді негізсіз деп тапты: ұсынылған медициналық қорытындылар келісімшартта көрсетілмеген мекемелерден алынған әрі барлық төлемдер жасалғаннан кейін рәсімделген.
Бірінші инстанция соты талапкерлердің материалдық шығын туралы талабын орынды деп танып, жауапкерден 550 мың теңге өндіріп алу туралы шешім шығарды.
Апелляциялық алқа істі қайта қарап, моральдық өтемақы бөлігіне түзету енгізді. Соттың түсіндіруінше, келісімшартта эмбрионды сақтау шарттары қарастырылмаған, ал оны жою туралы шешімді ерлі-зайыптылар өздері қабылдаған. Сондықтан бұл салдарға жауапкердің қатысы дәлелденбеген.
Қорытындысында материалдық шығынды өндіру туралы шешім күшінде қалдырылып, моральдық зиянды өтеу талабы қанағаттандырылмады. Сот қаулысы заңды күшіне енді.