RUS
Таразда өткен жекпе-жек бір минутқа да жетпей аяқталды. Жамбыл облыстық полиция департаментінің «Динамо» спорт мектебінің тәрбиеленушісі Бауыржан Әли қарсыласын небәрі 57 секундта нокаутқа жіберіп, айқын басымдық көрсетті.
“ALASH PRIDE FC” лигасы аясында өткен кездесуде жас спортшы алғашқы секундтардан-ақ тізгінді өз қолына алды. Ол қарсыласы – Тәжікстан өкілі Раджаббой Ахмедовке дәл әрі ауыр соққылар сериясын дарытып, есін жиғызбады. Жекпе-жектің 57-секундында төреші қарсыластың айқасты жалғастыруға шамасы жоқ екенін байқап, нокаутты тіркеді.
Бауыржан Әли – тек рингте емес, қызметте де жауапты тұлға. Ол – ҚР ІІМ Б.Бейсенов атындағы Қарағанды академиясының 3-курс курсанты, полиция сержанты. Соған қарамастан, спорттағы қарқынын бәсеңдетпей келеді.
Бұған дейін ол Қарағандыда өткен Ғалым Жарылғаповты еске алуға арналған халықаралық турнирде топ жарып, кәсіби боксқа қатысу лицензиясын алған. Спортшы – Қазақстанның спорт шебері, ел чемпионы және түрлі халықаралық, республикалық жарыстардың бірнеше дүркін жеңімпазы.
Қазір Бауыржан ұлттық құраманың сапында. Оқу мен спортты қатар алып жүрген жас боксшы халықаралық ареналарда ел намысын қорғауды жалғастырып келеді.