RUS
SMARTNEWS.KZ басылымының хабарлауынша, Ресейдің Орынбор облысында полиция қызметкерлеріне қарулы шабуыл жасаған күдіктінің жеке басы анықталды. Тергеу деректеріне сәйкес, ол — 1974 жылы туған, 52 жастағы Сергей Басалаев. Ер адамның Қазақстанда, бұрынғы Оңтүстік Қазақстан облысына қарасты Түлкібас ауданында дүниеге келгені белгілі болды.
Оқиға Ақкермановка кентінде болған. Федералдық іздеуде жүрген күдіктіні ұстауға келген полиция қызметкерлеріне ол қарсылық көрсетіп, атыс қаруымен оқ атқан.
Қақтығыс салдарынан бір полиция қызметкері қаза тауып, тағы үшеуі жарақат алып, ауруханаға жеткізілген.
Ресейлік дереккөздердің мәліметінше, күдікті ақ кабинасы бар «ГАЗон» жүк көлігімен қашып кетуі мүмкін. Сондай-ақ оның автоматпен қаруланғаны айтылады. Кейін күдікті мінген болуы ықтимал көлік Белошапка ауылы маңынан табылған.
Қазір іздеу жұмыстары осы аумақта шоғырланған. Операцияға полиция, Росгвардия, кинологтар жұмылдырылып, тікұшақ тартылған. Аумақ қоршауға алынып, негізгі бағыттарда бақылау бекеттері қойылған.
Қауіпсіздік мақсатында бірқатар елді мекендер мен табиғи аумақтарға, оның ішінде «Губерлин таулары» қорық аймағына уақытша кіруге шектеу енгізілді.
БАҚ мәліметінше, күдіктінің бұрын заңмен проблемалары болған және қарыздары да бар. Сондай-ақ ол ЛНР құрамындағы мотожаяу әскер бригадасында қызмет еткен болуы мүмкін деген ақпарат тарады. Кей деректерде оның Украинадағы соғыс аймағында болғаны да айтылып отыр, алайда бұл мәліметтер ресми түрде расталған жоқ.
Аталған дерек бойынша қылмыстық іс қозғалып, күдіктіні іздестіру жалғасып жатыр.