RUS
SMARTNEWS.KZ басылымының хабарлауынша, Маңғыстау облысының Қарақия ауданында орналасқан Жетібай ауылындағы «Жауқазын» балабақшасы төңірегінде дау туындады. Әлеуметтік желіде тараған бейнежазба балалар арасындағы жанжалдан кейін қоғам назарын аударды.
Ата-аналардың бірі балабақшада агрессия көрсететін бала бар екенін мәлімдеді. Оның айтуынша, бұл бала өзімен бірге кеңсе пышағын алып жүріп, қатарластарын қорқытып, қыз балаларды ұрып-соғатын көрінеді.
«Ол топтар арасында еркін жүріп, басқа балаларға тиіседі. Ұйықтасаңдар, бір жерлеріңді кесіп тастаймын деп қорқытады», — делінген ата-ананың шағымында.
Сондай-ақ ата-ана бұл баланың балабақша басшысының баласы екенін алға тартып, жағдайға тиісті деңгейде реакция болмай отырғанына алаңдаушылық білдірді. Оның сөзінше, балалардың қауіпсіздігі екінші орынға ысырылған.
Ата-аналарға бейнежазба түсіруге және бақылау камераларындағы жазбаларды алуға рұқсат берілмеген. Учаскелік инспектор мұндай материалдарға тек ресми арыздан кейін ғана қол жеткізуге болатынын түсіндірген.
Жалпы ата-аналар балалардың қауіпсіздігіне алаңдап, лауазымына қарамастан әділ әрі ашық тексеріс жүргізуді талап етіп отыр.
Маңғыстау облыстық білім басқармасы жағдайдан хабардар екенін мәлімдеді. Ведомство 2026 жылдың 20 сәуірінен бастап қызметтік тексеріс басталатынын хабарлады.
Арнайы жұмыс тобы құрылып, оқиғаның барлық мән-жайы жан-жақты қаралатыны айтылды. Тексеру қорытындысы бойынша қолданыстағы заңнама аясында тиісті шаралар қабылданады.