RUS
SMARTNEWS.KZ басылымының хабарлауынша, Атырау облысының Құрманғазы ауданында киіктердің жаппай қырылуы тұрғындарды алаңдатып отыр. Дала кей жерлерде өлексеге толып кеткен. Жергілікті шаруалардың айтуынша, жануарлардың өлекселері көзге көрінген жердің бәрінде жатыр.
Куәгерлердің сөзінше, жағдай санитарлық қауіп төндіруі мүмкін. Тұрғындар ауру таралуынан қауіптеніп отыр.
«Даламен жүру мүмкін емес — жан-жағы өлексеге толы. Егер оларды уақтылы жоймаса, түрлі ауру тарауы мүмкін. Бұл малға да зиянын тигізе ме деп алаңдаймыз», — дейді шаруалар.
Ресми дерекке сәйкес, бүгінгі күнге дейін 800-ден астам киік өлексесі жиналған. Оларды жою жұмыстарына «Охотзоопром» мамандары, «Ақжайық» қорығының қызметкерлері, аумақтық инспекция және жергілікті атқарушы органдар тартылған. Өлекселер өртеу және көму арқылы залалсыздандырылып жатыр.
Ал орман және жануарлар дүниесі аумақтық инспекциясы бұл жағдайды кенеден болған індетпен байланыстырмайды. Мамандардың айтуынша, бұл — табиғи құбылыс.
«Киіктер кенеден қырылып жатқан жоқ. Бұл — табиғи өлім. Қыс мезгілінен кейін жануарлар әлсіреуі мүмкін. Жалпы киіктің өмір сүру ұзақтығы 7–8 жыл шамасында», — деді бас маман Мереке Шалхаров.
Айта кетейік, бұған дейін Батыс Қазақстан облысынан Құрманғазы ауданына шамамен 800 киік кірген. Кейін олардың бір бөлігі Ресей аумағына өткен. Қазіргі таңда аудан аумағында 15 мыңға жуық киік бар.
Ресми органдар жүздеген жануардың қырылуын табиғи процесс деп бағалағанымен, жергілікті халық бұл пікірмен келіспей отыр.