RUS
SMARTNEWS.KZ басылымының хабарлауынша, Семей қаласында мысықтың кір жуғыш машинада қаза табуы қоғамда қызу талқыға түсті. Әлеуметтік желіде тараған жазба құқық қорғау органдарының назарын аударып, іс бойынша тексеріс жүргізілді.
Оқиғаға себеп болған — қала тұрғынының өзі жариялаған бейнежазбасы. Онда ол мысықтың қайғылы жағдайда өлгенін айтып берген. Бұл жазба желі қолданушыларының ашу-ызасын туғызып, жауапкершілікке тартуды талап еткен үндеулер көбейді.
Желіде тараған мәліметке сәйкес, баласы алдымен мысықты мұздатқышқа салып, кейін жануар кір жуғыш машинаның ыстық режиміне түскен. Алайда бұл деректер ресми түрде расталмады.
Абай облыстық полиция департаменті аталған дерек бойынша тексеру жүргізілгенін хабарлады. Ведомствоның мәліметінше, оқиға абайсызда болған.
«18 сәуір күні Семей қаласының тұрғыны әлеуметтік желідегі парақшасында мысықтың кір жуғыш машинада өлгені туралы бейне жариялаған. Тексеру барысында бұл жағдайдың абайсызда болғаны анықталды», — деп мәлімдеді полиция.
19 сәуірде жануар иесі жауапкершілікке тартылып, жануарларға жауапкершілікпен қарау талаптарын бұзғаны үшін 10 айлық есептік көрсеткіш көлемінде айыппұл салынды.
Оқиға қоғамда жануарларға қатыгездік мәселесін қайта көтеріп, әлеуметтік желіде үлкен резонанс тудырды.