RUS
SMARTNEWS.KZ басылымының хабарлауынша, Қазақстан Президенті Қасым-Жомарт Тоқаев көрнекті ақын, қоғам қайраткері, халық жазушысы, «Қазақстанның Еңбек Ері» Мұхтар Шахановтың дүниеден өтуіне байланысты оның туған-туыстары мен жақындарына көңіл айту жеделхатын жолдады.
Мемлекет басшысы жеделхатында Шахановтың қазақ руханиятындағы айрықша орнына тоқталып, оның өмір жолы мен шығармашылық мұрасын жоғары бағалады.
«Мұхтар Шаханов — бүкіл ғұмырын сөз өнеріне арнаған бірегей тұлға. Ол ұлттық поэзияны жаңа деңгейге көтеріп, әдебиет пен мәдениеттің көкжиегін кеңейтті. Ана тіліміздің тағдырына шын жанашыр болған қайраткер ретінде маңызды бастамалардың басында тұрды. Оның шығармалары әлемнің көптеген тіліне аударылып, оқырман жүрегінен орын алды. Артында бай әдеби мұра қалдырған ардақты азаматтың жарқын бейнесі ел жадында мәңгі сақталады», — делінген жеделхатта.
Президент ақынның өнегелі ғұмыры мен ұлттық мәдениетке қосқан үлесі ұмытылмайтынын атап өтті.