RUS
SMARTNEWS.KZ басылымының хабарлауынша, Алматыдағы футбол клубы жалған құжат қолданды деген күдікке ілінді. Қазақстан футбол федерациясы Бірінші лигада өнер көрсететін «Хан-Тәңірі» клубына қатысты қатаң шешім қабылдады.
Федерацияның Бақылау, тәртіп және этика комитеті жүргізген тексеріс барысында клуб өкілдері UEFA «C» санатындағы бапкерлік лицензияны растау кезінде жалған құжаттарды пайдаланғаны анықталған. Сонымен қатар, комитет дерегінше, клуб басшылығы тексеріс кезінде толыққанды ынтымақтастық танытпаған.
Осыған байланысты «Хан-Тәңірі» 50 айлық есептік көрсеткіш көлемінде айыппұл төлейтін болды. Клубқа құжаттарды толық ұсынып, түсініктеме беру үшін соңғы мүмкіндік берілді. Егер 14 мамырға дейін талаптар орындалмаса, командадан ұпай шегерілуі, төменгі дивизионға түсірілуі немесе жауапты тұлғалар футболдан шеттетілуі мүмкін.
Клубтың өзі бұл жағдайға қатысты түсініктеме берді. Олардың айтуынша, аталған бапкерлер сынақ мерзімімен қабылданған. Құжаттар тапсырылған сәтте олардың түпнұсқалығын толық тексеру мүмкін болмаған. Кейін лицензиялау процесі кезінде құжаттардың жарамсыз екені анықталып, клуб ол мамандармен келісімді тоқтатқан.
Қазіргі таңда аталған бапкерлер клуб құрылымында жұмыс істемейді. «Хан-Тәңірі» федерация жүргізіп жатқан барлық тексерістерге толық қолдау көрсетіп жатқанын мәлімдеді.