RUS
SMARTNEWS.KZ басылымының хабарлауынша, Иран құрамасының 2026 жылғы футболдан әлем чемпионаты турниріне қатысуы әлі де белгісіз. Елдің спорт министрі Ахмад Доньямали қауіпсіздік мәселелеріне байланысты соңғы шешім қабылданбағанын мәлімдеді.
2026 жылғы мундиаль тарихта алғаш рет 48 команда қатысатын кеңейтілген форматта өтеді және бірден үш елде — АҚШ, Мексика және Канада аумағында ұйымдастырылады. Жарыс 11 маусым мен 19 шілде аралығына жоспарланған.
Министрдің айтуынша, Иран құрамасының турнирге бармауы да ықтимал сценарий ретінде қарастырылып отыр. Дегенмен команда кез келген шешімге дайын болуы тиіс. Қорытынды шешім елдегі қазіргі ахуалға байланысты қабылданады және ол үкімет пен ұлттық қауіпсіздік жөніндегі жоғары кеңес деңгейінде талқылануы мүмкін. Негізгі талап — спортшылардың қауіпсіздігін толық қамтамасыз ету.
Бұған дейін Иран тарапы ФИФА-мен келіссөз жүргізіп, АҚШ-та өтуі тиіс матчтарды Мексикаға ауыстыру мүмкіндігін қарастырған.
Аймақтағы шиеленіс бұл мәселені одан әрі күрделендіріп отыр. Ақпан айының соңында АҚШ пен Израиль Иран аумағындағы нысандарға соққы жасаған. Иран тарабының дерегінше, салдарынан мыңдаған адам қаза тапқан. Кейін уақытша бітім жарияланғанымен, Исламабад қаласында өткен келіссөздер нақты нәтиже бермеген. Қазіргі таңда ашық қақтығыс туралы мәлімет жоқ, алайда АҚШ тарапынан порттарға шектеу қойылғаны хабарланып отыр, ал делдалдар жаңа келіссөз кезеңін ұйымдастыруға тырысуда.