RUS
SMARTNEWS.KZ басылымының хабарлауынша, Ақтөбеде өткен тойдағы 4 миллион теңгелік сыйлық қоғамда қызу талқыға түсті. Әлеуметтік желіде тараған видеода беташар кезінде себетке қомақты қаржы салынғаны көрінеді. Көп ұзамай желі қолданушылары видеодағы адамның Ақтөбе қалалық мәслихатының депутаты Аслан Қайырғалиев екенін анықтаған.
Қоғамдық сын күшейген соң, депутат жағдайға қатысты түсініктеме берді. Оның айтуынша, бұл — жақын досының тойы, ал берілген ақша жеке емес, достарының ортақ сыйлығы болған. Сонымен қатар, қаржыны жария түрде санау сәті сырт көзге орынсыз көрінуі мүмкін екенін мойындап, мұндай әрекетпен мақтануды немесе назар аудартуды көздемегенін айтты.
Алайда бұл түсініктеме сын толқынын баса алмады. Ақтөбе қалалық мәслихатында депутаттың әрекеті қолдау таппай, 20 сәуірде депутаттық әдеп жөніндегі комиссия мәселені қарап, оған сөгіс жариялау туралы шешім қабылдады.
27 жастағы Аслан Қайырғалиев кәсіпкерлікпен айналысады. 2022 жылдан бері «Анвар» сауда желісі директорының орынбасары қызметін атқарады. 2025 жылдың қазан айынан бастап Ақтөбе қалалық мәслихатының сегізінші шақырылым депутаты ретінде сайланған. Оның әкесі — Ұил ауданын басқаратын Асқар Қайырғалиев.
Әлеуметтік желі қолданушыларының басым бөлігі бұл әрекетті орынсыз деп бағалады. Көпшілік мұндай қадамды «көрсеқызарлық» және «артық көрсетілім» деп атап, әсіресе әлеуметтік теңсіздік күшейген кезеңде мұндай демонстрация қоғамға кері әсер ететінін алға тартты.